#ទន់ភ្លន់តែរឹងមាំ “ភាពទន់ភ្លន់ និងចិត្តស្រគត់ស្រគំ វាតែងបង្ហាញពីភាពម៉ឺងម៉ាត់របស់ស្ត្រី។ វាគឺជាឥរិយាបថដ៏ល្អកម្ររកបាន ដែលស្រ្តីគ្រប់រូបប្រកាន់ខ្ជាប់ក្នុងបេះដូង ឬរក្សាទុកក្នុងខ្លួនម្នាក់ៗ។ មិនត្រឹមតែប៉ុណ្ណោះ ភាពស្ងៀមស្ងាត់និងភាពអៀនខ្មាស វាក៏ជាសម្រស់ដ៏បរិសុទ្ធរបស់ស្រ្ដីផងដែរ”។ ក្នុងន័យនេះ “ទន់ភ្លន់ តែមិនទន់ជ្រាយ។ រឹងមាំ តែមិនរឹងរួស”។ ធម្មជាតិបានបង្កើតមនុស្សស្រីឱ្យមានភាពទន់ខ្សោយផ្នែករាងកាយជាងមនុស្សប្រុស តែបើមនុស្សស្រីអាចកែប្រែពីភាពទន់ខ្សោយ ទៅជាទន់ភ្លន់វិញ នោះវានឹងបង្កើតទៅជាអំណាចមួយផងដែរ។ ពេលខ្លះទៀត ការមិននិយាយមួយម៉ាត់ វាមានអំណាចជាងការនិយាយរាប់ពាន់ម៉ាត់ទៅទៀត។ ទាំងនេះជាអំណាចដែលមេដឹកនាំស្រ្តីក្នុងពិភពលោកតែងមាន ដូចជាអ្នកស្រីអង់សាន ស៊ូជី (Aung San Suu Kyi), អ្នកស្រី ម៉ាការ៉េត តីតឈ័រ (Margaret Thatcher), និង ម៉ាឡាឡា (Malala) ជាដើម។ អ្នកនិពន្ធប្រលោមលោកជនជាតិបារាំង Jules Barbey d'Aurevilly និយាយថា “មានរូបរាងស្អាត ហើយត្រូវបានគេស្រឡាញ់ទើបជាស្រ្តី។ ប៉ុន្តែមិនស្អាតហើយ ហើយចេះធ្វើឱ្យគេស្រឡាញ់ ទើបចំជារាជនី”។ បែបនេះហៅថា “ស្រីក្ងិត ស្រីក្ងែង បើចេះតុបតែង ស្អាតដូចតែគ្នា”។ ពេលខ្លះ មនុស្សស្រីភ្លេចគិតខ្លួនថាខ្លួនឯងជាផ្កាមួយទងដែលស្រស់ស្អាត និងប្រៀបដូចជាផ្កាយមានតម្លៃមួយដួង។ ប៉ុន្តែ នៅពេលដែលផ្កាមួយទងនោះ ព្យាយាមធ្វើដំណើរទៅរកកន្លង់វិញ ផ្កានោះនឹងត្រូវសណ្ដកឫសក្លាយទៅជាផ្កាស្រពោនបាត់បង់ទាំងសម្រស់ និងតម្លៃ (បរិបទខ្លះ)។ ក្ដីស្រឡាញ់របស់ស្រីម្នាក់ វាពុំបានន័យត្រូវធ្វើសំពត់ក្នុងផ្នត់ នំតូចជានាឡិក៏ពិតមែន តែពេលខ្លះការយកតម្លៃរបស់ខ្លួនឯងទៅលលេងជាមួយមនុស្សប្រុសហួសហេតុពេក វានឹងបាត់បង់តម្លៃ (ពេជ្រគ្មានរស្មី)។ ភាពទន់ភ្លន់នៃមនុស្សស្រី វាគ្រប់គ្រាន់សម្រាប់ចងចិត្តមនុស្សប្រុសឱ្យជាប់បាន ព្រោះថាចំណងដែលជាប់ជាងគេ គឺជាចំណងដែលចងដោយខ្សែដែលទន់ មិនមែនជាខ្សែដែលរឹងនោះទេ។ ----------------------------------------- អត្ថបទដកស្រង់ចេញពីសៀវភៅ #គំនិតជាកំណើត និពន្ធដោយ លោក ទេព សុផានេត។ សៀវភៅនេះកំពុងបើកកក់ ហើយវានឹងបន្តរហូតដល់ថ្ងៃទី២៥ ខែឧសភានេះ។ លោកអ្នកអាចកក់សៀវភៅនេះបានដោយគ្រាន់តែផ្ញើសារលេខទូរសព្ទ ទីតាំងលម្អិត និងចំនួនសៀវភៅដែលចង់បានតាមប្រអប់សារ ឬអាច Comment នៅខាងក្រោម Post នេះក៏បាន។ តម្លៃសម្រាប់អ្នកកក់ ២៨០០០រៀល ហើយតម្លៃទូទៅគឺ៣២០០០រៀល